Do姐带队去旅行！英、法、澳Shopping 率先睇

不论你对郑裕玲Do姐的印象係牙尖嘴利的毛小慧、抑或提你出门要买保险的代言人，其精明消费形象确实深入民心。今回主持《Do姐去Shopping》本着一年平均去三五七次旅行的经验和识饮识食歎世界宗旨，出征巴黎、伦敦、澳洲的塔斯曼尼亚和墨尔本奉旨购物。对于旅游shopping有独到见解的Do姐，保证此行疯狂扫货、败家行为绝不发生。节目播出前，向大家率先拆解Do姐「特别的Shopping技巧」！

出巡路线：

旅游经验丰富的Do 姐，私下旅行都经常欧游，所以今次要去三地拍摄可谓去惯去熟，唯独塔斯曼尼亚首次踏足。不过相比平日慢慢歎世界，今次为了一连三周共15集节目，都要分别 在今年5、6、9月先后出发三地。飞得咁频密，加上每站停留仅10日，即係两日就要完成一集，你都咪话唔赶！

#1 精明首诫 斋睇唔买

身家丰厚的Do 姐一早储够钱退休，靠的可能係平日够精打细算。旅程中Do 姐讲明「买嘢要精明，试清楚先。」工作人员表示见得最多唔係畀钱的画面，係Do 姐左试右拣，最终「斋睇唔买」。在巴黎去到以手工精细见称、连英国皇妃海蒂婚纱上的喱士都是她们出品的Sophie Hallette，Do 姐即使对各款式心动，不过一听见动辄几十至几百蚊欧元一码，她都选择忍手。

#2 物有所值 毫不吝啬

论Shopping 资历Do 姐肯肯定係神枱级，所以已经储落一大堆心得，「如果见到心头好， 唔好谂住返转头先买，因为旅行好少行回头路。」平日着重运动养生keep fit 的Do 姐去到澳洲就选择在瑜伽服饰专门店Lorna Jane，豪花过万港元买走几套衫。「虽然话香港咩都有得买，不过款式少，就算价钱贵，难得去到又实用都要扫货！」所以锺意画画的Do 姐去到巴黎以製作世界上第一枝油画笔闻名的画具店Sennelier 都拣了几款颜色特别，香港买不到的颜料。

#3 复古新潮 无一不晓

作为长青辈级潮流icon 的Do 姐，原来都係第一次亲身在巴黎睇时装骚。为了配合时装周，摄製队专登安排到9月底先出发，但因拍摄时间紧迫，最终只睇到Elie Saab 春夏时装一场。平日霸气十足的Do 姐，难得见到品牌设计师、再入后台化妆间，即时好似小粉丝咁兴奋。不过搵得Do 姐又点会只係讲新潮，对Vintage 都有研究的她，会同翠如、农夫在巴黎的古董市场穿梭，一齐鉴赏跨越不同年代的名牌珠宝、绝版首饰同行李箱。

#4 家品情怀 放弃名牌

Do 姐当年拍剧贴钱打工，出动私伙名牌手袋同台演出。不过如今她自己就话已过咗追求名牌的年纪，出游比较锺意添置家品， 所以在英国都特意去到当地被Timeout 杂誌选为Top100之一的潮流家具店Darkroom。但最令记者惊讶是在塔斯曼尼亚的Salamanca Market，Do 姐居然睇中得意可爱的薰衣草啤啤熊，最后仲推介幕后工作人员齐齐扫货买入多只回港。

#5 跟风唔型 网购要醒

平时贵气上身的Do 姐其实唔止识得高档Brand，小品设计都会留意。「因为名牌香港都有不少，所以如果去到当地会多睇非大品牌出品。」难怪佢喺巴黎都会买入多款小店手工製的戒指。此店虽然有网购服务，不过Do 姐话：「我锺意在实体店试过先， 除非对嗰间店好熟悉同信心先会网购。」贯彻试啱先买的原则之余，仲话以前经常买完返去无用而浪费，最好知道自己的风格先入货，咪盲目跟风！

#6 精挑送礼 手信啱使

Do 姐自己去旅行都有买手信的习惯，两位电台拍档少爷占和Donald 都收过几次。不过今次高调出差周游列国，结果同普通打工仔一样，收到一张张来自艺人朋友的手信清单。而完成「任务」之余，拍摄过程中佢都不忘再拣心水礼物送人，仲会解释原因。讲到底Do姐送礼最紧要啱对方使，好过乱买派街唔得体。

《Do姐去Shopping 》

日期：11月9日至27日

播出时间：周一至五晚上10时30分

频道：翡翠台/高清翡翠台